Bu gün 44 günlük Vətən müharibəsi şəhidi Cəbrayıl Dövlətzadənin doğum günüdür.
Azərbaycan Silahlı Qüvvələrinin əsgəri olan Cəbrayıl Dövlətzadə 2001-ci ildə Sumqayıt şəhərinin Corat qəsəbəsində anadan olub.
Müddətli həqiqi hərbi xidmətini Cəlilabadda başa vuran Cəbrayıl 2020-ci ilin Tovuz döyüşlərində general Polad Həşimovun şəhid olmasından sonra düşməndən qisas almaq üçün könüllü olaraq orduya yazılıb.
2020-ci il sentyabrın 27-də başlanan Vətən müharibəsinin ilk günündə Murovdağ istiqamətində gedən döyüşlərdə xüsusi təyinatlıların tərkibində savaşıb. 19 yaşlı Cəbrayıl Dövlətzadə bir erməni generalını və polkovnikini əlləri ilə boğaraq öldürüb. Bununla hər kəs onu general-mayor Polad Həşimovun qisasını alan qəhrəman kimi tanıyıb.
O, sentyabrın 28-də Murovdağda döyüş tapşırığını yerinə yetirərkən qəhrəmancasına şəhidlik zirvəsinə yüksəlib. General-mayor Polad Həşimovun məzarının yaxınlığında, II Fəxri xiyabanda sentyabrın 29-da torpağa tapşırılıb.
Göstərdiyi qəhrəmanlığa görə ölümündən sonra "Vətən uğrunda", "Kəlbəcərin azad olunmasına görə" medalları və "Azərbaycan Bayrağı" ordeni ilə təltif edilib.
