Sumqayıtda rəfiqəsini bıçaqlayan yeniyetmənin işi üzrə istintaq başa çatıb. Sumqayıt24 bu haqda 5 dekabr tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə hökm oxunub. Qərara əsasən, Aygün Quliyevaya (ad-soyad şərti) şərti cəza verilib. Onun barəsində seçilmiş yetkinlik yaşına çatmayanı nəzarət altına vermə qətimkan tədbiri ləğv edilib.
İttihama görə, şəhər sakini, 15 yaşlı Aygün Quliyeva əvvəllər rəfiqəsi olmuş yaşıdı Aminə Səmədovanın (ad-soyad şərti) onun arxasınca nalayiq ifadələr işlətdiyini eşidib və əxlaqsız hərəkətlər etdiyini görüb. Buna görə Aygün onu qorxutmaq üçün tanışından cib bıçağını götürərək üzərində saxlayıb.
Hadisə günü o, Aminənin yaşadığı ünvana gəlib və söhbət etmək üçün onu binanın həyətinə dəvət edib. Aygün rəfiqəsinin arxasınca nalayiq ifadələr işlətməsinin səbəbini soruşub. Lakin Aminə kobud cavab verib və aralarında mübahisə yaranıb. Bu zaman Aygün özü ilə gətirdiyi cib bıçağı ilə ona üç dəfə zərbə vurub.
Xəstəxanaya çatdırılan yaralının həyatı xilas edilib.
Daha sonra Aygün Quliyeva saxlanılıb və istintaq orqanı tərəfindən onun barəsində Cinayət Məcəlləsinin “qəsdən sağlamlığa ağır zərərvurma” maddəsi ilə ittiham elan edilib.
