Onlayn xəritələrdən tez-tez istifadə edənlər yəqin ki, müxtəlif ərazilərə qəribə adların veridliyinin şahidi olublar. Bu tendensiya Sumqayıt şəhərindən də yan keçməyib.
Sumqayit24.az xəbər verir ki, naməlum şəxslər müəyyən yerləri, hətta fərdi yaşayış evləri və obyektləri mizahi, bəzən isə təhqiramiz sözlərlə adlandırırlar.
Məsələn, Sumqayıtın xəritəsində Orxanın evi, mənim məktəbim, Həmzənin kruqu, Bombey, bibigil, Durna nənənin villası, “Do kontsa məşq zalı”, Vaqifin “saroçkası”, Sonanın yetimləri, molla Fedya, “razval” Azər, “bezkraska” Mehman, Tamara nənə, “Salam, bakuş”, “Yetimlər evi” restoranı, “Söhbət olsa, gəlin” və sairə adlara rast gələ bilərsiniz.
Ortaya sual çıxır: onlar bunu necə edir və xəritələrin məxsus olduğu brauzer buna nəzarət edirmi?
Məlumata görə, "Google Map"da bir neçə nəfər müraciət edərək, bir yeri etiketləyərək, hər hansı adı verə bilər. Bu, platformanın texniki imkanlarıdır. Xəritədə həqiqətə uyğun olmayan yerlər, təxribat xarakterli məqamlar aşkar etdikdə aidiyyəti üzrə müraciət olunur, silinməsi bildirilir və həmin nöqtələr silinir. Bu imkanlar bütün ölkələr, bütün istifadəçilər üçün eynidir.
