Rusiyanın Yekaterinburq şəhərində Azərbaycan təyyarəsinin qurbanlarının xatirəsinə qoyulan memorial demontaj edilib.
Sumqayit24.az rus mediasına istinadən xəbər verir ki, memorial yerli sakinlər və diaspor nümayəndələri tərəfindən spontan olaraq Azərbaycanın konsulluğu qarşısında qurulub. Xatirə abidəsinə çiçəklər qoyularaq təyyarə qurbanlarının xatirəsi yad edilib. Azərbaycanın konsulluğunun binasında isə bayraq yarıya qədər endirilib.
“Ural paytaxtının sakinləri Azərbaycanın konsulluğu binası önünə gül gətirərək başsağlığı bildirir, aviasiya qəzasında həlak olanların xatirəsinə ehtiram göstərir və qurbanların ailələrinə dəstək olmaq məqsədilə bir dəqiqəlik sükutla xatirələrini yad edirlər,” – deyə yerli mediada qeyd olunub.
Lakin dekabrın 28-də “Komsomolskaya Pravda – Yekaterinburq” qəzetinin müxbiri konsulluğun binasında artıq memorialın olmadığını bildirib. Binanın fasadına yaxın, Karl Libknecht küçəsi tərəfdə, yalnız səkidə iki qırmızı qərənfil qalıb.
Hadisənin səbəbləri və memorialın kim tərəfindən söküldüyü barədə rəsmi açıqlama verilməyib.
