"Sabah" futbol klubunun UEFA Çempionlar Liqasının pley-off mərhələsində İsrailin "Hapoel" (Beer-Şeva) komandası ilə keçirəcəyi oyunla əlaqədar Bakı Metropoliteninin iş rejimində dəyişiklik ediləcək.
Sumqayit24.az xəbər verir ki, bu gün saat 20:45-də Tofiq Bəhramov adına Respublika stadionunda keçiriləcək qarşılaşma penaltilər seriyasına qədər davam edərsə, metropolitenin stansiyaları gecə saat 01:00-a qədər sərnişinlərin girişinə açıq olacaq.
Məlumata əsasən, oyunla əlaqədar "Gənclik" stansiyasında gücləndirilmiş iş rejimi tətbiq ediləcək. Ehtiyat qatarlar xəttə buraxılmaq üçün hazır vəziyyətdə saxlanılacaq, növbətçilik əsasında əlavə köməkçi işçi qüvvəsi ayrılacaq.
Həmçinin "Nərimanov" və "28 May" stansiyalarında əlavə tədbirlər görüləcək.
Qeyd olunub ki, gün ərzində qatarların hərəkəti mövcud qrafik üzrə davam etdiriləcək.
