Sumqayıtda “Şagird Diksiya Klubu” layihəsinin bağlanış tədbiri keçirilib. Bu barədə deputat Müşfiq Məmmədli xəbər yayıb.
Tədbir YAP Sumqayıt Şəhər Təşkilatının inzibati binasında təşkil olunub. 35 nömrəli məktəbin ibtidai sinif müəllimi Nigar Vəliyeva rəhbəri olduğu layihənin məqsədi haqda danışıb.
Çıxış edənlər şagirdlərdə ünsiyyət qurma və fikir çatdırma, özünüifadə, diksiya vərdişlərinin formalaşmasına yardımçı olmaq, Azərbaycan dili və natiqlik sənəti haqqında maarifləndirmək, nitq mədəniyyəti haqqında anlayış və nitq vərdişlərinin aşılanması, gənclərin yazılı ünsiyyət mühitindən şifahi ünsiyyət mühitinə yönləndiriliməsi, bölgələrimizdən gələn və hələ də ləhcələrlə danışan, bunun üçün toplum qarışısında çıxışlardan çəkinən gənclərimizin diksiya vərdişlərini inkişaf etdirmək barədə fikir bildiriblər.
Qeyd edək ki, Təhsildə İnkişaf və İnnovasiyalar üzrə VI qrant müsabiqəsinin qalibi olan bu layihə Elm və Təhsil Nazirliyinin maliyyə dəstəyi, Abşeron-Xızı Regional Təhsil İdarəsinin, Sumqayıt Gənclər və İdman Baş idarəsinin təşkilati dəstəyi ilə baş tutub.
