Bu gün Şəhid polkovnik Şükür Həmidovun doğum günüdür. O, 1975-ci ildə Qubadlının Armudlu kəndində anadan olub, rayonun işğalından sonra isə ailəsi ilə birlikdə Sumqayıtda məskunlaşıb.
Şükür Həmidov 2016-cı ilin Aprel döyüşlərində "Lələtəpə" strateji nöqtəsinin alınması zamanı xüsusilə fərqləndiyi üçün Azərbaycanın Milli Qəhrəmanı adına layiq görülüb. Bununla da o, son 17 il ərzində sağlığında bu ada layiq görülən birinci şəxs olub.
Vətən müharibəsi zamanı da, qəhrəman polkovnikimiz Cəbrayıl, Füzuli və Qubadlı uğrunda savaşıb. 18 yaşında didərgin düşdüyü Qubadlıda 22 oktyabr 2020-ci il tarixində şəhid olub. II Fəxri Xiyabanda torpağa tapşırılıb.
Ölümündən sonra Həmidov “Zəfər” ordeni, "Vətən uğrunda", "Füzulinin azad olunmasına görə", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.
Qeyd edək ki, 2017-ci ildə Şükür Həmidovun həyatı və döyüş yolundan bəhs edən "Aprel yüksəkliyi" adlı kitab işıq üzü görüb. Bundan əlavə, 26 fevral 2019-cu ildə Nizami Kino Mərkəzində onun döyüş yoluna həsr olunan "Aprel yüksəkliyi" sənədli filmi təqdim olunub. Filmin ssenari müəllifi və rejissoru Zamin Məmmədovdur.
