Saray qəsəbəsində elektrik enerjisinin tez-tez kəsildiyi bildirilir.
Bu barədə Sumqayit24.az-a Muxtar Qasımov küçəsinin sakinləri məlumat veriblər.
Vətəndaşların iddiasına görə, Muxtar Qasımov küçəsindən Heydər Əliyev küçəsinədək olan ərazidə elektrik enerjisi hər gün kəsilir. Sakinlər qeyd edirlər ki, bəzən gün ərzində 4 saat işıqsız qalırlar. Bu isə onların gündəlik məişət işlərində müxtəlif problemlərin yaranmasına səbəb olur.
"Biz işıq üzünə həsrətik. Hər gün ən azı 4 saat işıqsız qalırıq. Nə yayda işıq oldu, nə də qışda. Artıq bezmişik. Müraciət etmişəm, deyirlər təmir gedir. Hər gün yay-qış dayanmadan təmir olar? Özüm müəlliməm, dünən şam işığında dərs keçmişəm", - deyə vətəndaş narazılığını qeyd edib.
Məsələ ilə bağlı "Azərİşıq" ASC-nin mətbuat xidmətinə sorğu ünvanlanıb.
