Saray qəsəbəsində fəaliyyət göstərən təhsil müəssisəsində təmir işlərinin natamam aparılması faktı üzə çıxıb. Sumqayıt24-ə yerli sakinlərdən daxil olan məlumata görə, söhbət Saray qəsəbəsi 1 nömrəli orta məktəbdən gedir.
Qeyd etmək yerinə düşər ki, Abşeron-Xızı Regional Təhsil İdarəsindən “Azərbaycan müəllimi”nə təqdim olunan məlumata əsasən, 2024-2025-ci tədris ili ilə əlaqədar Saray qəsəbə 1 nömrəli məktəbdə əsaslı təmir işləri həyata keçirilib. Amma sakinlərin redaksiyaya təqdim etdiyi fotofaktlara əsasən, heç bir əsaslı təmir işi həyata keçirilməyib, işlər yarımçıq saxlanılıb. Bu vəziyyət isə valideynləri narahat edir. Fotolardan da görünür ki, təhsil ocağı taxta konstruksiya ilə hörülüb.
“Artıq 3 ildir uşaqlarımız nə qədər yol qət edib 2 nomrəli məktəbə gedirlər. Şagirdlər axşam dərsdən 18:00, 18:30-da çıxıb qarandıq küçələrlə qorxa-qorxa evə qayıdırlar. Bu ilə təhvil veriləcək deyib yalan vədlər verirlər. Binanın təmirini yarımçıq qoyub yoxa çıxıblar”, - deyə valideyinlər əlavə ediblər.
