Saray qəsəbəsinin ən işlək hissəsi olan Heydər Əliyev prospekti uzun müddətdir tam qaranlığa qərq olub.
Gündə minlərlə avtomobil və yüzlərlə piyadanın hərəkət etdiyi bu yolun işıqlandırılmaması sakinləri ciddi narahat edir. Qaranlıq səbəbindən burada dəfələrlə ağır və ölümlə nəticələnən yol-nəqliyyat hadisələri baş verib.
Sakinlər bildirirlər ki, məsələnin dəfələrlə qaldırılmasına baxmayaraq, Abşeron Rayon İcra Hakimiyyəti problemi yalnız növbəti "tezliklə həll olunacaq" vədləri ilə uzadır. Qurum bu işıqlandırma məsələsini hər il müxtəlif bəhanələrlə geri atır və prospektin niyə qaranlıq qaldığı barədə dəqiq izahat verilmir.
"Prospektin gecələr tam zülmətə qərq olması həm piyadalar, həm sürücülər, həm də əraziyə yaxın yaşayan ailələr üçün real təhlükə yaradır. İşıqlandırmanın olmaması təkcə yol qəzalarının artmasına deyil, həm də ümumi təhlükəsizlik səviyyəsinin aşağı düşməsinə səbəb olur".
Sakinlər illərdir davam edən qaranlığın nəhayət aradan qaldırılmasını, prospektin işıqlandırılması üçün real işlərin başlamasını tələb edirlər.
