Saray qəsəbəsində telefon borcu üstündə qadını döyən şəxs barəsində məhkəmə qərarı verilib.
Məlumata görə, 1991-ci il təvəllüdlü Samir qeyri-rəsmi münasibətdə olduğu Zülfiyyə adlı qadına qarşı zorakılıq törədib.
Hadisəyə əsas səbəb tərəflər arasında yaranan mobil telefon və kredit borcu mübahisəsi olub.
Belə ki, zərərçəkmiş qadın öz adına kredit rəsmiləşdirərək Samirə mobil telefon alıb, lakin kişi həmin telefonun aylıq ödənişlərini ödəməkdən boyun qaçırıb. Küçədə rastlaşan zaman Zülfiyyə borcun ödənilməməsinə görə narazılığını bildirərək telefonun dərhal geri qaytarılmasını tələb edib.
Bu tələbdən qəzəblənən Samir qadını zorla evə salaraq onun boğazından yapışıb, sifət və bədən nahiyələrinə yumruq və təpiklə ağır zərbələr endirib. Faktla bağlı zərərçəkmişin bacısı dərhal "102" xidmətinə məlumat verib.Məhkəmə iclasında Samir əməlindən peşman olduğunu, dəymiş ziyanı ödədiyini və qadınla barışıq əldə etdiyini bildirib. Abşeron Rayon Məhkəməsinin hökmü ilə amnistiya aktı tətbiq olunub. Beləliklə, Samir cinayət məsuliyyətindən azad edilib və iş üzrə icraata xitam verilib. (adlar şərtidir)
Mənbə: Demokrat.az
