"MİDA" MMC tərəfindən Saray qəsəbəsində yeni yaşayış kompleksinin tikintisi ilə bağlı daha bir podratçı şirkət müəyyənləşib.
İqtisadiyyat.az-ın məlumatına görə, bu, "GM Construction" şirkətidir. Şirkət 4,5 ha torpaq sahəsində salınacaq yaşayış kompleksinin 8 və 9 nöm-li 16 mərtəbəli, 10, 11 və 12 nöm-li 12 mərtəbəli çoxmənzilli yaşayış binalarının, 13 nömrəli 1 mərtəbəli qeyri-yaşayış binasının tikintisini həyata keçirəcək.
"GM Construction" bu binaların tikintisinə görə MİDA-ya 31 milyon 255 min 488 manat ödəniş etməsini təklif edib. Yaxın günlərdə təklifin qəbul edilib müqavilə bağlanacağı gözlənilir.
Qeyd edək ki, MİDA Saray qəsəbəsindəki yaşayış kompleksinin tikintisi ilə bağlı daha əvvəl isə "Hünər-İnşaat" şirkəti ilə müqavilə bağlayıb və müqaviləyə görə, şirkət 26 milyon 369 min 453 manata 1 və 4 nömrəli 12 mərtəbəli, 2 və 3 nömrəli 16 mərtəbəli çoxmənzilli yaşayış binalarının, 14 və15 nömrəli 1 mərtəbəli qeyri-yaşayış binaları tikintisini həyata keçirəcək.
Xatırladaq ki, 4,5 ha torpaq sahəsində ümumilikdə 12 ədəd çoxmərtəbəli yaşayış binasının, eləcə də 3 ədəd birmərtəbəli qeyri-yaşayış binalarının tikintisi nəzərdə tutulur ki, buna da 105 milyon 840 min manat vəsaitin xərclənəcəyi ehtimal olunur. Tikintisi nəzərdə tutulan 1, 4, 5, 10, 11 və 12 nömrəli bina 12 mərtəbəli, 2, 3, 6, 7, 8 və 9 nömrəli bina isə 16 mərtəbəli olacaq.
Saraydakı yeni yaşayış kompleksinin tikinti layihəsinin hazırlanması işləri hələ ötən ilin sentyabrında "Arch-tikinti" şirkətinə həvalə olunub.
