Sumqayıtın yollarını saxtakarlıqda ittiham olunmuş şirkət təmir edəcək. Sumqayıt24 bu haqda 7 iyul tarixində Bizim.media-ya istinadən xəbər verir.
Mənzil-Kommunal Təsərrüfatı Birliyinin elan etdiyi “Sumqayıt şəhərində küçə və parklarda abadlıq işlərinin” və “Sahil küçəsində yolun asfalt örtüyünün əsaslı təmirinin” satın alınması ilə bağlı 2 tenderin qalibləri açıqlanıb.
Müsabiqəni qazanan “Azərenerji Təchizat” MMC və “Xezer Construction” MMC ilə ümumilikdə 2 milyon 947 min 270 manatlıq satınalma müqaviləsinin bağlanması nəzərdə tutulub.
Nizamnamə kapitalı 10 manat olan “Azərenerji Təchizat” MMC 1 milyon 299 min 866 manat müqabilində 20 Yanvar, P. Hüseynov, Z. Hüseynov, Ə. Kərimov, K. Hüseynov, M. Hüseynzadə küçələrində, Azərbaycan prospektində, o cümlədən 17-ci mikrorayonda, 9-cu mikrorayonda 58-ci binaya və Alman parkının yanı ilə kollecə gedən yoldakı səkilərdə, Sumqayıt Dövlət Universitetinin qarşısındakı və Lüdviqshafen parkında təmir, bərpa və abadlıq işlərini həyata keçirəcək.
Bu şirkətin ciddi qanun pozuntusuna yol verdiyi məlum olub.
"Azərenerji Təchizat” MMC 2019-cu ildə dövlət qeydiyyatına alınıb. Şirkətin hüquqi ünvanı 46-cı məhəllədə yerləşir, qanuni təmsilçisi Çobanov Famil Eldar oğludur.
Əvvəlki qanuni təmsilçi isə Qafurzadə Xəyal Səlim oğlu olub. Bununla bağlı 2021-ci ildə reyestr məlumatlarına dəyişiklik edilib. Güman ki, bununla da qanuni təmsilçi dəyişib.
Açıq mənbələrdə “Azərenerji Təchizat” MMC və Famil Çobanov barəsində hər hansı məlumat yoxdur. Şirkət yarandığı gündən bəri yalnız Sumqayıtın yerli qurumlarının, əsasən də İcra Hakimiyyətinin elan etdiyi çoxmilyonluq tenderlərin qalibi olur.
Təkcə 2023-cü ildə Sumqayıt ŞİH və ona tabeli qurumların 4 tenderini qazanıb. Bura indi bəhs etdiyimiz tender də daxildir. Bağlanan satınalma müqavilələrinin ümumi maliyyə dəyəri isə 6 milyon 49 min 247 manatdır.
Diqqətə çatdıraq ki, ötən ilin dekabrında Antiinhisar və İstehlak Bazarına Nəzarət Dövlət Xidməti dövlət satınalmalarında ciddi qanun pozuntusu ilə bağlı Baş Prokurorluğa müraciət edib.
Müxtəlif dövlət qurumlarından daxil olmuş yekun protokollar təhlil edilərkən elektron satınalma vasitəsilə keçirilmiş açıq tenderlərdə iştirak üçün bəzi dövlət orqanları adından təqdim edilən sənədlərin sahibkarlar tərəfindən saxtalaşdırılmasına dair əsaslı şübhələr müəyyən edilib.
Saxtakarlığa yol verən sahibkarlar arasında “Azərenerji Təchizat” MMC də var.
“Dövlət satınalmaları haqqında” qanunda göstərilir ki, satınalan təşkilat satınalma prosedurları ilə bağlı hər hansı qərarın qəbul olunmasına təsir göstərmək məqsədilə malgöndərənin (podratçının) saxtakarlıqla məşğul olmasını müəyyənləşdirdikdə və bu, müvafiq icra hakimiyyəti orqanı tərəfindən təsdiq edildikdə, həmin malgöndərənin təqdim etdiyi tender təkliflərini, ofertaları və kotirovkaları rədd edir.
Bundan başqa, malgöndərənin gələcək satınalma prosedurlarında iştirakı qeyri-müəyyən müddətə və ya müvafiq icra hakimiyyəti orqanının müəyyənləşdirdiyi müddətə qadağan edilir.
Həmçinin saxtakarlıq hallarının araşdırılması üçün məlumatlar müvafiq səlahiyyətli orqanlara təqdim edilir. Tender təklifinin, ofertanın və ya kotirovkanın rədd edilməsi, bunun səbəbləri satınalma prosedurları haqqında hesabatda göstərilir və dərhal malgöndərənə bildirilir.
Sumqayıt MKTB-nin “Sahil küçəsində yolun asfalt örtüyünün əsaslı təmiri işlərinin satın alınması” tenderinin qalibi “Xezer Construction” MMC (VÖEN - 1603218151) seçilib.
Tərəflər arasında 1 milyon 647 min 404 manatlıq satınalma müqaviləsi bağlanacaq. Şirkət Sahil küçəsində yolun asfalt örtüyünü əsaslı təmir edəcək.
