“İnformasiya sistemləri və texnologiyalar: nailiyyətlər və perspektivlər” mövzusunda onlayn formatda III Beynəlxalq elmi konfrans keçirilib. Bu haqda 8 dekabr tarixində Sumqayıt24 xəbər verir.
Görüşün təşkilatçıları Sumqayıt Dövlət Universiteti və İdarəetmə Sistemləri İnstitutu olub. Burada yerli universitetlərlə yanaşı, Türkiyə, Rusiya, Bolqarıstan və digər ölkələrin aparıcı təhsil ocaqlarının mühəndis alimləri də iştirak ediblər.
Bildirilib ki, konfransın keçirilməsinin məqsədi müasir informasiya və kommunikasiya texnologiyalarının (İKT) inkişaf ənənələri, perspektivləri sahəsində alim və mütəxəssislərin elmi nailiyyətləri barədə müzakirələr aparmaqdır. İştirakçılar informasiya-ölçmə və idarəetmə sistemləri, sistemli analiz və modelləşdirmə, mexatronika və robototexnika, korporativ informasiya sistemləri və onların tətbiqi, intellektual avtomatlaşdırılmış layihələndirmə sistemləri mövzularında fikir mübadiləsi aparıblar.
Mühəndislik fakültəsinin dekanı, dosent Ulduz Ağayevin sözlərinə görə, konfransın Təşkilat komitəsinə Türkiyə, Rusiya, Bolqarıstanın 15 universitetindən, respublikamızın 8 elm və ali təhsil müəssisəsindən 200-dən artıq məruzə və tezis daxil olub. Proqram komitəsi tərəfindən 132 məruzə (xarici ölkələrdən 14 məruzə) Konfransın gündəliyinə daxil edilib.
