Sumqayıt Dövlət Universitetində (SDU) “Müasir Azərbaycanın sosial-iqtisadi inkişaf modelinin aktual problemləri və onların həllində iqtisadçı alimlərin rolu” mövzusunda elmi-praktiki seminar keçirilib. Bu haqda 4 iyul tarixində Sumqayıt24 SDU-ya istinadən məlumat verir.
Ümummilli lider Heydər Əliyevin 100 illik yubileyinə həsr edilmiş tədbirdə deputat Ziyad Səmədzadə, millət vəkili Vüqar Bayramov, Azərbaycan Dövlət İqtisad Universitetinin professoru, Əməkdar müəllim Məhiş Əhmədov və universitetin professor-müəllim heyəti iştirak ediblər.
Toplantıda Milli Məclisin deputatı Vüqar Bayramov “Azərbaycanın iqtisadi inkişaf hədəflərinin əsaslandırılmasında elmi-iqtisadi araşdırmaların rolu” mövzusunda məruzə ilə çıxış edib.
Daha sonra Azərbaycan Dövlət İqtisad Universitetinin professoru, Əməkdar müəllim Məhiş Əhmədov “Azərbaycanda iqtisad elmində fundamental tədqiqatların təşkili və səmərəli aparılmasının müasir problemləri”, SDU-nun Dünya iqtisadiyyatı və marketinq kafedrasının professoru Şəfa Əliyev “Sosial-iqtisadi inkişafın aktual problemlərinin həlli yollarının müəyyənləşdirilməsində konseptual elmi-iqtisadi yanaşmaların formalaşdırılması prioritetləri” mövzularında məruzə ediblər.
Seminarın sonunda akademik Ziyad Səmədzadənin “Azərbaycan iqtisadiyyatı 100 ildə” beşcildliyinin SDU-nun iqtisadçı-tədqiqatçı alimlərinə təqdimatı olub.
