Sumqayıt Dövlət Universitetindəki (SDU) işindən çıxarılan tarix üzrə fəlsəfə doktoru, dosent Neyman Xasayev məhkəməyə müraciət edib.
Qaynarinfo.az-ın məlumatına görə, onun iddia tələbi işə bərpa və işsiz qaldığı müddət üçün əmək haqqının ödənilməsidir.
İşə Sumqayıt Şəhər Məhkəməsində hakim Günel Tanrıverdiyevanın icraatında baxılacaq.
Neyman Xasayevin işdən çıxarılmasının səbəbi barədə məlumat yoxdur. Məsələnin detallarını öyrənmək üçün tərəflərlər əlaqə saxlamaq cəhdlərimiz nəticə verməyib.
Neyman Xasayev SDU-nun "Tarix və onun tədrisi metodikası" kafedrasında işləyib. Araşdırmalarımız zamanı məlum olub ki, o, bir neçə il əvvəl işdən çıxarılıb və bir dəfə məhkəmə yolu ilə işə bərpa olunmağa çalışsa da, mümkün olmayıb.
Qeyd edək ki, SDU-nun hazırkı rektoru Rüfət Əzizovdur. O, 2023-cü ildən universitetə rəhbərlik edir. Neyman Xasayev Rüfət Əzizovun sələfi Elxan Hüseynovun dövründə işdən çıxarılıb.
