“Kapital Bank”ın data analitikası üzrə eksperti Sumqayıt Dövlət Universitetində (SDU) yüksək vəzifəyə təyin edilib.
Sumqayıt24 xəbər verir ki, Əhməd Əhmədzadə İT proqramları rəhbəri və rektorun müşaviri oldu. O, 2018-ci ildə ADA Universitetinin “İnformasiya texnologiyaları və sistemləri mühəndisliyi” ixtisasını bakalavriat səviyyəsi üzrə, 2020-ci ildə Bakı Mühəndislik Universitetinin “İdarəetmədə informasiya sistemləri” ixtisaslaşmasını magistratura səviyyəsi üzrə fərqlənmə diplomu ilə bitirib.
2019-cu ildən indiyə qədər “Kapital Bank”da Data elmi üzrə mütəxəssis, aparıcı mütəxəssis, baş mütəxəssis, ekspert, maşın öyrənmə və data analitikası üzrə daxili təlimçi vəzifələrində çalışıb.
2021-2024-cü illərdə müxtəlif universitetlərdə - Bakı Mühəndislik Universitetində, Azərbaycan Texniki Universiteti, Azərbaycan Dövlət Neft və Sənaye Universiteti, Azərbaycan Respublikası Dövlət Gömrük Komitəsinin Akademiyasında İT fənlərini tədris edib.
2022-ci ildən Azərbaycan Respublikası Elm Və Təhsil Nazirliyi İnformasiya Texnologiyaları İnstitutunda doktorantura təhsili alır.
İnformasiya texnologiyaları sahəsində beynəlxalq təcrübənin öyrənilməsi ilə bağlı xaricdə müəllimlərin mübadilə proqramı, fakültə təlim proqramlarına qatılıb. Həmçinin bir çox yerli təlim, tədbirlərdə iştirak edib və müxtəlif müsabiqələrdə münsif olub.
