Sumqayıt Dövlət Universitetində (SDU) ali təhsil müəssisəsinin tələbələrindən ibarət "Debat klubu"nun yeni tədris ilində ilk təqdimatı keçirilib.
Sumqayit24.az xəbər verir ki, Mükəmməllik Mərkəzinin təşkilatçılığı ilə keçirilən tədbir Böyük Akt zalında təşkil olunub. Tədbirdə klubun nailiyyətləri barədə videoçarx nümayiş edilib və "Debat Klubu"nun yeni üzvlərinin də iştirakı ilə təqdim olunan mövzu üzrə debat-şou başlayıb.
Debatda iştirak edən komandalar universiteti bir çox ümumrespublika turnirlərində layiqincə təmsil edən "İstiqlal" və "Maksimalist" komandaları olub. Gənclər debat klubuna üzv olaraq natiqlik, araşdırma və yüksək səviyyəli ünsiyyət qurma bacarıqlarını inkişaf etdirə biləcəklərini əyani formada nümayiş etdiriblər.
Müzakirədə iştirak edən "İstiqlal" və "Maksimalist" komandalarının spikerləri Günay Ramazova və Musa Əhmədov mövzu ətrafında mülahizələrini onlara ayrılan vaxt müddətində komandalarla və tamaşaçılarla bölüşüblər.
Bunlardan sonra hər bir spikerə oponentlik edən qarşı tərəfin nöqteyi-nəzəri dinlənilib. 1 saata yaxın davam edən debatda mövzu ətrafında tamaşaçılar kifayət qədər maarifləndirici məlumat ala bildilər.
