Sumqayıtda məhəllələrin birində yaşayan keçmiş məcburi köçkünlər şəraitlə bağlı şikayət edirlər.
Sumqayit24.az-a daxil olan məlumata görə, 14-cü məhəllədə yerləşən internat binasında məskunlaşmış sakinlər uzun illərdir baxımsız qalan binada ağır şəraitdə yaşayırlar.
Onların sözlərinə görə, binada antisanitar vəziyyət hökm sürür. Xüsusilə köhnəlmiş elektrik xətləri və qırılmış kabellər tez-tez qısaqapanmalara səbəb olur ki, bu da yanğın təhlükəsini artırır.
Sakinlər bildirirlər ki, bina tədricən uçulub-dağılıb, divarlarda çatlar yaranıb, dam örtüyü isə yararsız hala düşüb. Yağışlı havalarda isə su sızmaları vəziyyəti daha da ağırlaşdırır.
Vətəndaşlar aidiyyəti qurumlardan əraziyə baxış keçirilməsini və mövcud problemin həll edilməsini tələb edirlər.
