Su çərşənbəsi Novruzun ilk çərşənbəsi hesab olunur. Xalq arasında bu gün "əvvəl çərşənbə", "gözəl çərşənbə", "sular Novruzu" və "gül çərşənbə" kimi də tanınır. Bu çərşənbə baharın gəlişinin və təbiətin oyanışının ilk işarəsi sayılır.
Su qədimdən bolluq, təmizlik və aydınlıq rəmzi kimi qəbul edilib. Azərbaycan xalqının inanclarında su ilə bağlı mərasimlər xüsusilə yeni ilin başlanğıcı ilə əlaqələndirilir. Rəvayətlərə görə, təzə ilin ilk günlərində axar suyun üzərindən tullanmaq insanı ötən ilin ağırlıqlarından, günah və çətinliklərindən təmizləyir. Eyni zamanda, Su çərşənbəsində axar sudan keçənlərin il boyu sağlam və gümrah qalacağına inanılır.
Bu gün süfrəyə su qoymaq da qədim adətlərdəndir. İnanca görə, əgər süfrəyə su tökülərsə, bu, ilin bərəkətli və ruzi-bol keçəcəyinə işarədir.
Su çərşənbəsinin maraqlı ənənələrindən biri də su falıdır. Xüsusilə subay qızlar həmin axşam bir yerə toplaşaraq fal mərasimi keçirirlər. Fal üçün su əvvəlcədən bulaqdan və ya çaydan götürülür. Bu suya "lal su" deyilir. Suyu gətirən şəxs qabı götürdüyü andan fal qabına tökənədək danışmamalıdır. Əks halda, inanca görə, fal doğru çıxmaz.
Beləliklə, Su çərşənbəsi həm təmizlik, həm də yeni başlanğıcların rəmzi kimi Novruz yolunun ilk addımı sayılır və xalqımızın zəngin mərasim ənənələrini yaşadır.
