Sumqayıtda vətəndaşların 58%-i istismar müddəti 30 ildən çox olan binalarda məskunlaşıb. Sumqayıt24 bu haqda 7 iyul tarixində Report.az-a istinadən xəbər verir.
Sosial Tədqiqatlar Mərkəzinin (STM) idarə heyətinin sədri Zahid Oruc "Tikinti sektoru subyektləri arasında vahid müqavilə formasının tətbiq zərurəti, tənzimlənməyən münasibətlərin sektorda yaratdığı problemlər və onların həlli yolları" mövzusunda konfransda çıxış edib.
Onun sözlərinə görə, Sumqayıt üzrə sorğuya qatılanların cəmi 7%-i son 30 il ərzində inşa edilmiş binalarda yaşadığını bildiriblər. İştirakçıların 44%-i istismar müddəti 30 ildən 60 ilə qədər olan, 13 %-i 60 ildən çox olan binalarda məskunlaşıb. Həmçinin sakinlərin 7%-i son 10 il ərzində, 16 %-i 10 ildən 30 ilə qədər müddətdə tikilmiş binalarda yaşayır.
