"Glassica" şirkəti Rumıniya və Moldovaya 250 mindən çox şüşə tara ixrac edib. Bu barədə 26 yanvar tarixində Sumqayıt24 xəbər verir.
Şirkətin koorporativ direktoru Emil Əsgərov media nümayəndələrinə açıqlama verib:
“Fəaliyyətə başladığımızdan keçən ay yarım ərzində təxminən 3 milyon ədəd şüşə tara istehsal etmişik. Bunun da 250 mindən çoxu ixrac edilib, qalanı isə daxili tələbatı ödəmək üçün istifadə edilib. Hazırda Gürcüstan, Fransa və İtaliyaya ixracla bağlı danışıqlar aparırıq, müqavilə bağlamaq üzrəyik".
O bildirib ki, "Glassica" Kəlbəcər rayonunda tikiləcək mineral su istehsal edən zavodu da məhsulu ilə təmin edəcək:
"Zavod tam gücü ilə işləsə, daxili tələbatın 30-40 %-ni ödəyə bilər. Mart ayında ikinci zavodun tikintisinə başlanılacaq və 14 aya proses yekunlaşdırılacaq. Həmin müəssisə hazırkından 3-4 dəfə çox istehsal gücünə malik olacaq. Onun investisiya dəyəri isə 60 milyon manat təşkil edəcək. İndiki zavodun investisiya dəyəri 25 milyon manatdır".
