Sumqayıt şəhər 22 saylı bağça baxımsız vəziyyətdədir.
Bu şikayətlə Sumqayıt24-ə sözügedən bağçada təlim-tərbiyə alan uşaqların valideynləri müraciət ediblər. Şikayətçilərin sözlərinə görə, təhsil ocağı standartlara uyğun deyil. Burada olan çarpayılar sınıq, qapı və divarlar isə qırıq-tökük haldadır.
Həmçinin valideynlərdən biri iddia edir ki, bağçanın tərbiyəçiləri uşaqlara kobud və diqqətsiz yanaşırlar:
“Uşağın qolunu necə sıxmışdılarsa, göyərmişdi. Övladım bağça adı eşidəndə qorxudan ağlayır, məcbur olub onu oradan çıxardıq. Uşaqları başdan edirlər, ayaqqabılarını belə çıxartmırlar”.
Digər şikayətçi isə bağça binasına buraxılmadığını qeyd edib:
“Məni valideyn olaraq içəri buraxmırlar. Güclə girib baxdım. Hər yeri uçub tökülür. Kamera sistemi yoxdur”.
Məsələ ilə bağlı Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinə sorğu unvanlanıb.
Foto Sumqayıt24
