Sumqayıt gənclərinə 10 min manat dəstək ayrılıb

Sumqayıtda keçirilən "INNOSTART" Hakatonu çərçivəsində İnnovasiya və Rəqəmsal İnkişaf Agentliyi (İRİA) tərəfindən gənclərin inkişafına yönəlik ümumilikdə 10.000 AZN dəyərində maliyyə dəstəyi ayrılıb. Dəstək, hakatonun qalib komandalarına investisiya formatında təqdim edilib və onların təqdim etdikləri startap layihələrinin gələcəkdə inkişaf etdirilməsini hədəfləyir.

Sumqayit24.az xəbər verir ki, iki gün davam edən intensiv proqram müddətində iştirakçılar komandalar şəklində innovativ və texnoloji həllər üzərində çalışaraq ideyalarını münsiflər heyətinə təqdim ediblər. Hakaton zamanı iştirakçılar biznes modeli qurmaq, texniki yanaşmalar üzərində işləmək və layihələrini konkret təqdimat formatına salmaq imkanı əldə ediblər. Münsiflərin qiymətləndirməsi nəticəsində üç qalib komanda müəyyən olunub.

Qalib layihələr aşağıdakılardır:

• "Codepays" - Şirkətlərin İT sahəsində ixtisaslaşmış peşəkarları daha səmərəli şəkildə tapıb işə cəlb etməsini təmin edən platforma.


• "Biolonic" - Kimyəvi prosesləri rəqəmsal formada vizuallaşdıraraq təhsil və sənaye sahələrində istifadəsini asanlaşdıran platforma.


• "Student All" - Abituriyentlərin ixtisas seçimi mərhələsində onlara uyğun istiqamətləri müəyyənləşdirməsinə yardım edən seçim aləti.

"INNOSTART" Hakatonu SUP.VC şirkətinin təşkilatçılığı və İnnovasiya və Rəqəmsal İnkişaf Agentliyinin dəstəyi ilə həyata keçirilib. Layihə yerli startap ekosisteminin inkişafı və gənclərin texnologiya sahəsinə marağının artırılması baxımından mühüm əhəmiyyət daşıyır.