Sumqayıt Apellyasiya Məhkəməsində dələduzluqda təqsirləndirilən Aslan Qurbanovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, sonuncu keçirilən prosesdə qərar elan olunub.
Qərara əsasən, zərərçəkmiş şəxsin apellyasiya şikayəti təmin edilməyib.
İttihama görə, Aslan Qurbanov zərərçəkmiş S.S.-ə (adı, soyadı şərtidir) Abşeron rayonu, Xırdalan şəhəri, Yoncalıq yaşayış massivində fərdi yaşayış evlərinin tikilməsi üçün 0,14 ha torpaq sahəsi satacağına dair yalan vəd verib. O, 2023-cü ilin aprel ayının əvvəllərində Yoncalıq yaşayış massivində hissə-hissə, ümumilikdə 155 000 manat pulu alıb ələ keçirərək zərərçəkmiş şəxsə külli miqdarda ziyan vurmaqla dələduzluq edib.
Bundan başqa, o, zərərçəkmiş S.S.-ə Abşeron rayonu, Xırdalan şəhəri, AAAF park yaşayış kompleksinin yaxınlığında fərdi yaşayış evlərinin tikilməsi üçün 00,9 ha torpaq sahəsini özünə məxsus olmasını yalandan bildirərək, ona satacağına dair yalan vəd verib. O, 2023-cü ilin iyun ayının ortalarında 110 000 manat pulu zərərçəkmişdən AAAF park yaşayış kompleksinin yaxınlığında dələduzluq yolu ilə ələ keçirib.
Sumqayıt Ağır Cinayətlər Məhkəməsinin hökmü ilə Aslan Qurbanov 7 il 6 ay müddətə azadlıqdan məhrum edilib. Zərərçəkmiş şəxs (mülki iddiaçı) tərəfindən verilmiş mülki iddianın təmin olunub, ümumilikdə 265 555 manat məbləğində pulun təqsirləndirilən şəxsdən tutulmaqla zərərçəkmiş şəxsə ödənilməsi hökm edilib. Hökmdən narazı qalan zərəçəkmiş S.S. apellyasiya şikayəti verərək, Aslan Qurbanov barəsində daha uzun müddətə, yəni 10 il müddətinə azadlıqdan məhrumetmə cəzasının təyin edilməsini xahiş edib.
