Sumqayıtda təhsil müəssisələrində yuxarı sinif şagirdləri arasında kütləvi yoxlamaların aparıldığı bildirilir.
Minval.az-ın yaydığı məlumata görə, hüquq-mühafizə orqanlarının əməkdaşları şagirdlərin çantalarını və üstlərini qadağan olunmuş əşyaların olub-olmaması baxımından yoxlayırlar. Bu əşyalara deşici-kəsici vasitələr, tütün məmulatları və digər təhlükəli predmetlər daxil edildiyi qeyd olunur.
Qəfil yoxlamalar zamanı, əsasən, yetkinlik yaşına çatmayanların işləri üzrə inspektorlar siniflərə daxil olur və dərsdə olan şagirdlərin hər birini fərdi qaydada yoxlayırlar. Qadağan olunmuş əşya aşkarlanan şagirdlər əlavə söhbət üçün kənara aparılır, əşyanın məktəbə necə gətirildiyi araşdırılır. Bununla yanaşı, baş verən hadisə barədə dərhal məktəb rəhbərliyi və valideynlər məlumatlandırılır.
Qeyd olunur ki, artıq bir neçə gündür müəllimlər valideynlərdən uşaqları məktəbə göndərməzdən əvvəl onların çantalarını yoxlamağı xahiş edirlər. Buna səbəb son vaxtlar məktəblərdə yeniyetmələr arasında baş verən insidentlərin artmasıdır.
Belə hadisələrdən biri bir neçə gün əvvəl Bakının 286 nömrəli tam orta məktəbində qeydə alınıb. Bildirilir ki, 9-cu sinif şagirdi sinif yoldaşının üzərinə spirt tökərək onu yandırıb.
Həmçinin bu il fevralın 6-da səhər saatlarında "İdrak" liseyinin 10-cu sinif şagirdi atasına məxsus ov tüfəngi ilə məktəbə gələrək müəllim Şəhla Kamilovanı yaralayıb.
Qeyd edək ki, yoxlamalar həmçinin Saray, Ceyranbatan və Novxanı qəsəbələrinin yerəşdiyi Abşeron rayonunda da aparılır.
Sumqayit24.az məsələ ilə bağlı müvafiq quruma sorğu ünvanlayıb.
