Ramazan ayında iftar süfrələrinin təşkili, həmişəki kimi, gündəmin əsas mövzularından biridir. Bəziləri iftarını restoran və kafelərdə açmağa üstünlük verir, bəziləri isə dostlarına jest edərək iftar süfrələrinin məhz ictimai iaşə müəssisələrində təşkilinə çalışırlar.
Artıq Sumqayıtda və ətraf ərazilərdə fəaliyyət göstərən bir çox iaşə obyektləri xüsusi iftar menyularını təqdim etməyə başlayıblar. Menyularda şorba, xurma və sərinləşdirici içkilərdən tutmuş isti yeməklər, kabab növləri, plov, salatlar və şirniyyatlara qədər müxtəlif təamlar yer alır. Təklif olunan çeşidin zənginliyi isə qiymətlərdə fərqlilik yaradır.
Bəzi məkanlarda daha münasib paketlər təqdim olunsa da, mərkəzi ərazilərdə və yüksək xidmət səviyyəsi ilə seçilən restoranlarda qiymətlər xeyli dəyişir.
Bəs bu il restoranlarda iftar etmək istəyənlər nə qədər xərc çəkməli olacaqlar?
Oxu.Az-ın əməkdaşı müxtəlif ərazilərdə iftar menyularının qiymətlərini araşdırıb.
Ümumi qənaət belə oldu ki, paytaxtda fəaliyyət göstərən ictimai iaşə obyektlərində iftar menyusunun qiyməti bir nəfər üçün 25-90 manat arasında dəyişir.
Bəzi obyektlərdə iftarla yanaşı, imsak menyusu üçün açıq bufet də təşkil olunub. Bu zaman böyüklər üçün qiymət 18-20 manat təşkil edir. Yeddi yaşına qədər uşaqlar üçün ödəniş tələb olunmur, səkkiz yaşlı uşaqlara isə 50 faiz endirim tətbiq edilir.
Sumqayıt şəhərində isə qiymətlər 29-35 manat aralığındadır. Bu məbləğə üç çeşid şorba, soyuq məzələr, iki növ əsas yemək, meyvə suyu, ayran və şirniyyat olaraq xurma daxildir.
Müqayisə üçün qeyd edək ki, paytaxtın Nərimanov rayonu ərazisində iftar menyusunun qiyməti 25-50, Səbail rayonunda 25-35, Nizami küçəsi ərazisində isə 25-30 manat arasında dəyişir.
