Sumqayıtda 1985-ci il təvəllüdlü İlqar mübahisə zamanı keçmiş həyat yoldaşı Nərminəyə (adlar şərtidir – red.) xəsarət yetirib.
Demokrat.az-ın əldə etdiyi xəbərə görə, hadisə 1-ci mikrorayon ərazisində yerləşən uşaq bağçasının yaxınlığında baş verib.
Sumqayıt şəhər sakini İlqar telefon zənglərinə cavab vermədiyi üçün aralarında yaranan mübahisə zamanı keçmiş həyat yoldaşının bir dəfə yumruqla baş nahiyəsinə, bir dəfə sillə ilə sol qulaq nahiyəsinə və iki dəfə təpiklə sol ayağına zərbə endirib.
Hadisəni törədən İlqarın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən İlqar ona elan olunmuş ittiham üzrə özünü qismən təqsirli bilib. O, ifadəsində göstərib ki, Nərminə ilə 2 ilə yaxındır boşanıblar:
“Nərminədən boşansaq da, bizim əlaqəmiz qaldı, eyni evdə yaşamışıq. Hadisədən əvvəl Nərminəyə zəng edərək harada olduğunu soruşdum. Bu zaman Nərminə məni qəbul edə bilmədiyini deyərək, telefonu söndürdü”.
Təqsirləndirilən şəxs qeyd edib ki, daha sonra Nərminəyə zəng etsə də, onun zənginə cavab verilməyib:
“Bu səbəbdən Nərminənin işlədiyi uşaq bağçasına getmək qərarına gəldim. Həmin gün saat 12:20-də həmin bağçaya gedərək orada Nərminə ilə rastlaşdım. Ondan nə üçün telefon zənglərinə cavab vermədiyini soruşdum. Cavab olaraq “yaxşı etdiyini” deyərək nalayiq ifadələr işlətdi. Bu zaman Nərminənin hərəkətinə əsəbləşdim, onu özümdən uzaqlaşdırmaq üçün itələdim. Bundan sonra həmin ərazidən uzaqlaşaraq getdim. Hadisə təxminən 4-5 dəqiqə davam etsə də, yanımızda kimsə olmayıb. Hadisə vaxtı Nərminəni məni təhqir etdiyi üçün onu sadəcə sinəsindən itələmişəm. Eyni zamanda Nərminənin əyninə geyindiyi şalvar xoşuma gəlmədiyi üçün şalvardan tutaraq irəli geri dartmışam. Mən Nərminəni vurmamışam, döyməmişəm, bədən xəsarəti yetirməmişəm”.
İş üzrə zərərçəkmiş qismində ifadə verən Nərminənin sözlərinə görə, İlqarla 2 il olar rəsmi qaydada boşanıb:
“Buna baxmayaraq İlqar məni tez-tez narahat edib. Küçədə, evimin yaxınlığında, iş yerimdə qarşımı kəsərək narahat edib. Sonuncu dəfə hadisə günü saat 12:20-də işə gedərkən uşaq bağçasının yaxınlığında İlqar qarşımı kəsdi, telefon zənglərinə hansı səbəbdən cavab vermədiyimə irad bildirdi. Mənimlə mübahisə etməyə başladı, ünvanıma təhqiredici ifadələr səsləndirdi. Bundan sonra baş və bədənimin müxtəlif nahiyyələrinə yumruq, daha sonra isə təpiklə zərbələr endirdi, əynimdə olan şalvarı cırdı. Mən İlqarın əlindən güclə çıxaraq qaçdım. İİlqar məni döyən zaman iş yoldaşım Aydan yaxınlıqda olub və hadisəni görüb. Lakin bizə yaxınlaşmadı”.
Bu cinayət işinə Sumqayıt Şəhər Məhkəməsində baxılıb. Məhkəmənin hökmü ilə İlqar 5 ay müddətinə azadlıqdan məhrum edilib.
