Baş Dövlət Yol Polisi İdarəsinin stasionar postunda Sumqayıt sakini Orxan Allahverdiyevin idarə etdiyi “KİA” markalı avtomobil yoxlama-nəzarət qaydasında saxlanılıb.
Qafqazinfo.az xəbər verir ki, hadisə Salyanda baş verib. Sürücüdən sənədlər istənildikdə, o, avtomobildən düşərək qaçmağa çalışıb. Lakin polis əməkdaşları tərəfindən yaxalanıb. Araşdırma zamanı O. Allahverdiyevin narkotik vasitənin təsiri altında sükan arxasına əyləşdiyi müəyyən edilib.
Faktın araşdırılması zamanı polisin qanuni fəaliyyətinə müdaxilə etməyə cəhd edən sürücünün valideyni övladının hüquqazidd əməllərinə haqq qazandırmağa çalışıb, Dövlət Yol Polisi əməkdaşlarına hədə-qorxu gələrək, müqavimət göstərib.
Hər iki şəxs saxlanılaraq aidiyyəti üzrə polis orqanına təhvil verilib. Toplanan materiallar baxılması üçün məhkəməyə göndərilib.
