İnsanların “20 Yanvar” metro stansiyasından Sumqayıta gedişində çətinlik yaranıb.
Sumqayıt24 xəbər verir ki, avtobus zolağı çəkildikdən sonra “manatlıq” taksilər ərazidən uzaqlaşdırılıb. Buna görə, Sumqayıt sakinləri evlərinə getmək üçün uzun müddət gözləməli olurlar.
Azərbaycan Yerüstü Nəqliyyat Agentliyi (AYNA) yaranmış vəziyyətlə bağlı açıqlama yayıb. Bildirilib ki, xüsusi zolaq ictimai nəqliyyat istifadəçilərinin rahat, maneəsiz və əlavə vaxt itkisinə məruz qalmadan daşınmasına şərait yaradır:
“Paytaxtdan Sumqayıt şəhərinə yola düşmək istəyən vətəndaşlar Bakı Beynəlxalq Avtovağzal Kompleksinin (BBAK) imkanlarından yararlana bilərlər. Vətəndaşlar Sumqayıta daha tez çatmaq üçün bir dayanacaq irəli getməklə BBAK-dan müasir və komfortlu “Neoplan”larla yola düşə bilərlər.
Qeyd edək ki, ekspres avtobuslarla yanaşı, Bakı-Sumqayıt istiqamətində gündəlik olaraq müntəzəm marşrut xətləri üzrə 21 avtobus da sərnişinlərə xidmət göstərir.”
