Ötən ilin oktyabr ayında "Sumqayıt Nəqliyyat" MMC-nin əməkdaşı Tofiq Saydumov Bizim.Media-ya verdiyi açıqlamada şəhərdaxili avtobusların 2026-ci ilin yanvar ayından kart sisteminə keçəcəyini bildirmişdi.
O, eyni zamanda ilin sonunadək Sumqayıt şəhərinin 100 ədəd CNG (sıxılmış təbii qaz) və elektriklə işləyən yeni nəqliyyat vasitələri ilə təmin olunacağını da vəd etmişdi.
Lakin artıq yeni ilə qədəm qoyulmasına baxmayaraq, nə kart sisteminə keçidlə, nə də 100 yeni avtobusun istismara verilməsi ilə bağlı hər hansı irəliləyiş müşahidə olunur. Bu vəziyyət Sumqayıt sakinlərinin narazılığına səbəb olub. Həmşəhərlilərimiz aldadıldıqlarını düşünərək məsələ ilə bağlı redaksiyamıza çoxsaylı müraciətlər ediblər.
Məsələni dəqiqləşdirmək məqsədilə Sumqayit24.az-ın əməkdaşı "Sumqayıt Nəqliyyat" MMC-yə sorğu ünvanlayıb. Qurumdan sorğuya cavab olaraq bildirilib ki, Sumqayıt şəhərində nəqliyyat infrastrukturunun mərhələli şəkildə yenilənməsi istiqamətində ardıcıl tədbirlər həyata keçirilir:
"Marşrut xətlərində istismar olunan köhnə avtobuslar müasir tələblərə cavab verən, daha komfortlu və təhlükəsiz nəqliyyat vasitələri ilə əvəz olunur, yeni avtobuslar mərhələli şəkildə xəttə buraxılır.
Avtobuslarda ödənişlərin kart sistemi vasitəsilə həyata keçirilməsinə gəlincə, bu məsələ nəqliyyat sahəsində aparılan ümumi müasirləşmə prosesinin tərkib hissəsidir. Kart sisteminə keçid avtobus parkı tam şəkildə yeniləndikdən və texniki hazırlıq işləri yekunlaşdırıldıqdan sonra mərkəzləşmiş qaydada tətbiq ediləcək.
Hazırda bu istiqamətdə müvafiq qurumlarla koordinasiyalı şəkildə işlər davam etdirilir. Prosesin başa çatması və kart sisteminə keçidlə bağlı qərar qəbul edildikdən sonra ictimaiyyətə əlavə məlumat veriləcək".
Bununla yanaşı, redaksiyamız tərəfindən Azərbaycan Yerüstü Nəqliyyat Agentliyinə (AYNA) də sorğu ünvanlanaraq, Tofiq Saydumovun ötən ilin oktyabrında verdiyi açıqlamanın sözügedən qurumla koordinasiyalı şəkildə olub-olmadığı dəqiqləşdirilib.
Qurumdan bildirilib ki, ölkə üzrə sərnişindaşımada nağdsız ödəniş sisteminin tətbiqinin sürətləndirilməsi istiqamətində işlər aparılır və Sumqayıt şəhəri də bu baxımdan prioritet hesab olunur:
Lakin konkret tarixlə bağlı AYNA tərəfindən heç bir açıqlama bundan öncə olmayıb.
Əlavə olaraq bildirək ki, hazırda Sumqayıtda ictimai nəqliyyatda sərnişinlərə göstərilən xidmətlərin təhlükəsizlik və keyfiyyət baxımından yüksək standartlara çatdırılması məqsədilə marşrut xətləri təhlil edilir, marşrut şəbəkəsinin optimallaşdırılması üçün nəqliyyat planı hazırlanır".
