Gənclərin İnkişaf və Karyera Mərkəzinin Abşeron-Xızı regional nümayəndəliyi və onun bölmələri tərəfindən oktyabr ayı ərzində bir sıra fəaliyyətlər həyata keçirilib.
Mərkəzin Abşeron bölmə mütəxəssisi Günay Niyazovanın Sumqayit24.az-a verdiyi məlumata görə, Sumqayıtda “Regionun Gənc Eko-Səfirləri” proqramı çərçivəsində gənclərə “COP29 və Ekologiya” mövzusunda təqdimat təşkil olunub. Regionun gənc eko-səfiri Famil Pirəliyev tərəfindən Sumqayıt Dövlət Texniki Kolleci, Sumqayıt Musiqi Kolleci və İqtisadi Zonaların İnkişafı Agentliyi nəzdində Peşə Təhsil Mərkəzində təhsil alan gənclərlə keçirilən görüşdə iqlim dəyişikliyi, ekoloji problemlər və COP29-un əhəmiyyəti müzakirə edilib.
Abşeronda gənclər “Yaşıl Gələcək: Gənclərin Səsi” adlı tədbirdə iştirak ediblər. COP29 çərçivəsində keçirilən bu simulyasiya tədbirində iqlim dəyişikliyi ilə mübarizə yolları müzakirə edilib və fikir mübadiləsi aparılıb. Tədbirdə iqlim siyasəti, davamlı inkişaf, ekosistemlərin qorunması və innovativ həll yolları ilə bağlı təkliflər irəli sürülüb. Tədbir Abşeron Rayon İcra Hakimiyyəti və Gənclərin İnkişaf və Karyera Mərkəzinin Abşeron-Xızı regional nümayəndəliyinin Abşeron bölməsinin birgə təşkilatçılığı ilə baş tutub.
Ay ərzində Sumqayıtda şəxsi inkişaf istiqamətində “YouthStart” təlimlər silsiləsi, “İntellektual Gənclik” və “Gəncdən Gəncə” adlı fəaliyyətlər keçirilib.
Karyera quruculuğu istiqamətində, Gənclərin İnkişaf və Karyera Mərkəzinin Abşeron-Xızı regional nümayəndəliyi və Sumqayıt Dövlət Universitetinin Tələbə Həmkarlar İttifaqı Komitəsinin birgə təşkilatçılığı ilə Sumqayıtda "LevelUP" layihəsi çərçivəsində “COP29 və İqtisadi, Siyasi, Ekoloji İnkişafda Gənclərin Rolu” mövzusunda forum təşkil olunub. Forumda iqtisadi və ekoloji məsələlər müzakirə edilərək gənclərin bu sahələrdəki rolu vurğulanıb. Bundan əlavə, müəllimlərin elektron resurslardan istifadə bacarıqlarını artırmaq məqsədilə təlim keçirilib. Abşeronda isə “Komanda quruculuğu” və “CV hazırlanması” mövzularında təlim baş tutub.
Könüllülük və sosiallaşma istiqamətində Sumqayıtda “Mərkəzə Doğru” layihəsi və “Gəncdən Gəncə” adlı silsilə tədbirlər keçirilib. Abşeronda da “Mərkəzə Doğru” layihəsi baş tutub.
Ümumilikdə, ay ərzində Sumqayıt və Abşeronda keçirilən 25 fəaliyyət çərçivəsində 1718 gənc iştirak edib.
