Sumqayıtın ən gediş-gəlişli yerlərinin birində hərəkət düzgün tənzimlənməyib.
Bu barədə Sumqayit24.az-a şəhər sakinləri məlumat veriblər. Onlar bildiriblər ki, minlərlə insanın istifadə etdiyi Sumqayıt Dəmiryolu Vağzalının önündə nə işıqfor, nə piyada zolağı, nə də ki, avtobuslar üçün dayanacaq var.
“Yolun ortasında dayanan taksilər və parklanmış fərdi avtomobillər vəziyyəti daha da qəlizləşdirir. İnsanlar yolu keçə bilmir, avtobusu gözləməyə yer tapmırlar. Avtobuslar isə taksi və fərdi avtomobillərin nizamsız parklanması və dayanması səbəbindən yolun ortasında dayanmağa məcbur olurlar. Bu isə avtobusdan enən və nəqliyyat vasitəsinə minən sərnişinlərin həyatı üçün təhlükə yaradır.
Məsul qurumlardan problemimizə əncam çəkməyi xahiş edirik”, - deyə şikayətçilər əlavə ediblər.
