Xəbər verdiyimiz kimi, Sumqayıtın Hacı Zeynalabdin qəsəbəsində yerləşən 3 nömrəli xəstəxanası qəzalı vəziyyətdədir.
Belə ki, binanın müxtəlif hissələrində iri çatlar əmələ gəlib. Bu vəziyyət isə vətəndaşlarda ciddi narahatlıq yaradıb.
Sumqayit24.az-ın sorğusuna TƏBİB-dən bildirilib ki, Sumqayıt Tibb Mərkəzinin nəzdində olan və Sumqayıt şəhəri, Hacı Zeynalabdin qəsəbəsində fəaliyyət göstərən 3 nömrəli Şəhər Xəstəxanasının binası 1916-cı ildə inşa olunmuş tarixi tikilidir.
"Uzunmüddətli istismar nəticəsində binanın bir sıra konstruktiv elementlərində aşınma halları müşahidə olunur. Mövcud vəziyyətlə bağlı aidiyyəti qurumlar tərəfindən əraziyə baxış keçirilib, binanın texniki vəziyyəti yerində qiymətləndirilib. Baxış zamanı mövcud çatlar və digər texniki qüsurlar qeydə alınaraq müvafiq rəy formalaşdırılıb. Mövcud vəziyyət nəzərə alınaraq, gələcəkdə həmin ərazidə müasir standartlara cavab verən yeni tibb müəssisəsinin inşası nəzərdə tutulur",- deyə məlumatda qeyd edilib.
***
Sumqayıtda xəstəxanalardan birində təhlükəli vəziyyət yaranıb.
Sumqayit24.az-a müraciət edən vətəndaşların sözlərinə görə, Hacı Zeynalabdin qəsəbəsində fəaliyyət göstərən 3 nömrəli xəstəxana qəzalı vəziyyətdədir.
Göndərilən fotolardan da aydın görünür ki, binanın müxtəlif hissələrində iri çatlar əmələ gəlib. Xəstəxanaya gün ərzində çoxlu insanın müraciət etdiyini nəzərə alsaq, təhlükənin miqyasının böyük olduğu üzə çıxır.
Şikayətçilərin məlumatına əsasən, məsələ ilə bağlı Sumqayıt Tibb Mərkəzinə müraciət etməyə çalışsalar da, problemlərini aidiyyəti şəxslərə çatdıra bilməyiblər.
"Vəziyyəti Sumqayıt Tibb Mərkəzinin direktoruna çatdırmaq üçün gedirik. Qapıda mühafizəçi deyir ki, müavinlər yoxdur, direktor isə məşğuldur. Gərək başımıza uçsun, altında qalaq, ondan sonra tədbir görülsün?", - deyə vətəndaş narazılığını ifadə edib.
Şikayətçilər aidiyyəti qurumlardan xəstəxanaya baxış keçirilməsini, təhlükəsizlik tədbirlərinin görülməsini və problemin aradan qaldırılmasını tələb edirlər.
Qeyd edək ki, məsələ ilə bağlı aidiyyəti qurumlara sorğu ünvanlanıb.
