Bu gün sovet rejiminin Azərbaycanda törətdiyi daha bir ağır cinayətin — alimlərin qətlə yetirilməsinin üzərindən 36 il keçir.
1990-cı il yanvarın 24-də Sumqayıt–Bakı magistral yolunun 24-cü kilometrində, Ceyranbatan qəsəbəsi ərazisində sovet tankçıları Sumqayıtdakı iş yerlərinə gedən beş kimyaçı alimin olduğu avtomobili bilərəkdən əzərək üstündən keçiblər. Hadisə 20 Yanvar faciəsindən cəmi dörd gün sonra baş verib.
Qətlə yetirilən alimlər — kimya elmləri doktorları İbrahim İbrahimov, Svetlana Məmmədova və İsmayıl Mursaqulov sovet rəhbərliyinə qarşı keçirilən etiraz aksiyalarında fəal iştirak edib, rejimin törətdiyi qırğınlara açıq etirazlarını bildirirdilər. Hadisə nəticəsində İdris Əhmədov və Parlaq Mustafayeva ağır yaralansalar da, sağ qala biliblər.
İbrahim İbrahimov və Svetlana Məmmədova hadisə yerində, İsmayıl Mursaqulov isə bir neçə gün sonra aldığı xəsarətlərdən dünyasını dəyişib. Onlar Bakının Şəhidlər xiyabanında dəfn olunublar, Sumqayıt Şəhidlər xiyabanında isə xatirə abidələri ucaldılıb.
Bakıdan Sumqayıta gedərkən yol kənarında bu hadisəyə həsr olunan monument da qoyulub.
