Ev almaq üçün 126 min manatdan çox vəsait ödənildi, amma nə ev var, nə də pul.
Xəzər TV-nin məlumatına əsasən, Sumqayıt şəhər sakini Rahim Bayramov aldadılıb. Onun vəkili Gülər Mirzəyeva deyir ki, ödəniş etməsinə baxmayaraq, nə mənzili, nə də ödənilən vəsaiti geri ala bilirlər.
Tələbkarın sözlərinə görə, mənzil üçün ümumilikdə 126.500 manat vəsait bank vasitəsilə ödənilib. Lakin sonradan nə mənzil təqdim edilib, nə də ödənilən məbləğ geri qaytarılıb.
Məsələ ilə bağlı işə baxan Sumqayıt Şəhər Məhkəməsi iddiaçı Rahim Orucəli oğlu Bayramovun xeyrinə qərar çıxarıb. Qətnaməyə əsasən, borclu tərəf - Sumqayıt şəhər sakini Nazim Səftər oğlu Məlikov icra vərəqəsi üzrə 126.500 manat vəsaiti ödəməlidir. Lakin aradan 4 il keçməsinə baxmayaraq, məhkəmə qərarı icra olunmayıb.
Mövzu ilə bağlı Ədliyyə Nazirliyinin Sumqayıt şəhəri üzrə İcra İdarəsindən bildirilib ki, Nazim Məlikov barəsində araşdırma aparılıb. İşin uzun müddət icra edilməməsi ilə bağlı həmin şəxs barəsində ciddi tədbirlər görülüb və bu tədbirlər davam etdirilir. Onun əmlakına həbs qoyulduğu, yaxın vaxtlarda isə daha sərt hüquqi addımların atılacağı vurğulanıb.
