Sumqayıtda 7 nömrəli avtobusun hərəkət qrafikində dəyişiklik olunduğu iddia edilir.
Bu barədə Sumqayit24.az-a yerli sakinlər məlumat veriblər.
Vətəndaşların iddiasına görə, 7 nömrəli sərnişin avtobusunun Sumqayıt Dəmiryol Vağzalının qarşısına qədər hərəkəti ləğv edilib.
"7 nömrəli marşrutun Sumqayıt Dəmiryol Vağzalına qədər hərəkət etməsi bizi sevindirmişdi. Amma bu gün sürücünün dediyinə görə, marşrutun bu istiqamətdə hərəkəti ləğv olunub. Nəzərə alsaq ki, metroda təmir işləri başlayıb, qatarla hərəkət edən sərnişinlərin sayı da artıb. Ona görə də 7 nömrəli marşrutun Dəmiryol Vağzalına qədər hərəkət etməsi vacibdir", - deyə sakinlər bildiriblər.
Sumqayit24.az-ın sorğusuna cavab verən Azərbaycan Yerüstü Nəqliyyat Agentliyinin (AYNA) mətbuat katibi Tural Orucov bu fikirləri təkzib edib.
"7 nömrəli marşrut Sumqayıt Dəmiryol Vağzalının qarşısına qədər hərəkət edir. Marşrut xəttində hər hansı bir dəyişiklik yoxdur", - deyə qeyd edib.
