Sumqayıtda qadın 41 yaşlı oğlu, gəlini və nəvələrini evdən qovub. Sumqayıt24 bu haqda 6 iyul tarixində xəbər verir.
İkinci qrup əlil Qiyamət Ağayev 14 ildir ki 5 nəfərlik ailəsi ilə Sarıqaya Metallurq düşərgəsindəki vaqonda yaşayır. Onlar 13-cü mikrorayon, ev 51a, mənzil 17-də qeydiyyatda olsalar da, son günlər anası tərəfindən məhkəməyə verilərək qeydiyyatdan çıxarılıblar. İndi ailə hara qeydiyyata düşəcəyi barədə düşünür.
Kişinin anası Gülbuta Ağayeva onlarla bərabər, həyat yoldaşı Muğan Ağayevi də həmin mənzildən çıxarıb.
Oğlunu, gəlinini və nəvələrini evdən qovan ana ilə Den.az telefon əlaqəsi yaradıb. Gülbuta Ağayeva bildirib ki, oğlu onu tez-tez döyürdu və evin dolanışığına heç bir köməklik göstərmirdi. Məhz ona görə oğlu, gəlini və 3 nəvəsini yaşadığı evdən qovub. İllər sonra onları qeydiyyatdan çıxarmasına səbəb isə Qiyamət tərəfindən narahat edilməsidir.
Qadın oğlu və ailəsinin heç vaxt o evə geri qayıtmayacaqlarını və onlarla tezliklə məhkəmədə görüşəcəyini bildirib.
