Sumqayıtda avtobuslar mərhələli şəkildə yenilənir. Xəbər verdiyimiz kimi, 7 nömrəli marşruta 10 yeni “AKIA” markalı avtobus gətirilib, həmçinin 123 nömrəli marşrut üzrə də bütün nəqliyyat vasitələri yenilənib.
Lakin Sumqayıt sakinlərini 3 ildir ki, düşündürən və narahat edən problemə hələ də çarə tapılmayıb. Söhbət nağdsız ödəniş sistemindən, nasaz validatorlardan gedir. Bu 3 il ərzində dəfələrlə məsələnin çözüləcəyi, xaricdən yeni validatorların sifariş edildiyi, yaxın zamanda gələcəyi vəd edilsə də, vəziyyət olduğu kimi qalıb. Ciblərinə maddi ziyan dəyən vətəndaşlara isə təzminat ödənilməyib.
Sumqayit24.az möcvud problemlə əlaqədar Azərbaycan Yerüstü Nəqliyyat Agentliyinə (AYNA) sorğu göndərib. Qurumdan sorğuya cavab olaraq bildirilib:
“Sumqayıtda bir ara tətbiq edilən və texniki səbəbdən baş tutmayan kart sistemi ilə bağlı Agentlik xəbərdardır. Əlavə edək ki, ölkə üzrə sərnişindaşımada nağdsız ödəniş sisteminin sürətləndirilməsi ilə bağlı tapşırıq verilib və işçi qrup yaradılıb.
Sumqayıt şəhərində də bu məsələ prioritet hesab olunur. Yaxın zamanda Sumqayıtda nağdsız ödəniş sisteminə keçidlə bağlı işlərə başlanılacaq”.
