Sumqayıtda musiqi məktəbi bağlanır.
Söhbət Ə.Bakıxanov adına H.Z. Tağıyev qəsəbə 1 nömrəli Uşaq İncəsənət Məktəbində gedir. Sumqayit24.az-a daxil olan məlumata görə, təhsil ocağının binasında iri çatlar yaranıb. Bu səbəbdən orada oxuyan 30 sinfin şagirdləri müvəqqəti olaraq 19 nömrəli məktəbə köçürüləcək.
Binanın təmir ediləcəyi, yaxud sökülüb, yenidən tikiləcəyi hələlik dəqiq bilinmir.
Qeyd edək ki, 1936-cı ildə xüsusi layihə üzrə tikilən bina 1982-ci ilin sentyabrından incəsənət məktəbi kimi fəaliyyət göstərir. Təhsil müəssisəsinə 1992-ci ildə görkəmli dövlət xadimi, tarzən Ə. Bakıxanovun adı verilib. Məktəbin 35 sinif otağı, kitabxanası, 150 nəfərlik konsert zalı var. Burada fortepiano, skripka, tar, kamança, qarmon, klarnet, nağara, rəsm ixtisasları üzrə dərs deyilir.
