Sumqayıtda yeni zavod tikiləcək.
Sumqayit24.az xəbər verir ki, Səudiyyə Ərəbistanının “ACWA Power” şirkətinin rəhbərlik etdiyi konsorsium Azərbaycanda dəniz suyunun duzsuzlaşdırılması ilə içməli su istehsalı zavodu layihəsini reallaşdıracaq.
Pilot layihənin əhatə dairəsi
Konsorsium tərəfindən qoyulacaq investisiya hesabına Sumqayıt Kimya Sənaye Parkında günlük istehsal gücü 300 min m³ su olan zavodun tikintisi planlaşdırılır.
Müəssisənin 2,5 il ərzində tikilməsi nəzərdə tutulur. Müqaviləyə əsasən, layihənin müddəti 27,5 ildir. Belə ki, konsorsium layihəni bu müddətdə idarə etdikdən sonra müəssisə Azərbaycan Dövlət Su Ehtiyatları Agentliyinin idarəetməsinə keçəcək.
Layihə Bakı şəhəri və Abşeron yarımadasının içməli suya artan tələbatını təmin etmək, şirin su mənbələrini şaxələndirmək, içməli su təchizatı sahəsində beynəlxalq təcrübəni və texnologiya transferini stimullaşdırmaq və xarici sərmayə cəlbi baxımından mühüm töhfədir.
Müsabiqədə “ACWA Power” şirkətinin rəhbərlik etdiyi konsorsiumun digər üzvü Türkiyənin “IC İçtaş İnşaat Sanayi ve Ticaret A.Ş.” şirkətidir.
“Yeni içməli su mənbələri yaratmaq çox vacibdir”
Mövzu ilə bağlı fikirlərini Bizim.Media ilə bölüşən Millət vəkili Aydın Hüseynov deyib ki, Azərbaycan ən az təbii su ehtiyatlarına malik ölkələrdəndir:
“Bizim su ehtiyatlarımızın 70 faizdən çoxu kənardan tədarük olunur. İqlim dəyişikliklərinin təsirlərini də bura əlavə etsək, o zaman vəziyyətin nə qədər ciddi olduğunu görərik. Bu mənada həm sudan səmərəli istifadə etmək, həm də yeni su mənbələri yaratmaq çox vacibdir.
Ölkənin içməli və suvarma suyuna olan tələbatının ödənilməsi üçün hökumətin bir çox layihələri mövcuddur. Su təsərrüfatı ilə məşğul olan 3 dövlət qurumunun bir arada - Dövlət Su Ehtiyatları Agentliyinin tərkibində birləşdirilməsi də sudan səmərəli istifadə etməyə və yeni su mənbələri yaratmağa xidmət edir”.
Gələcək perspektiv
Müsahibim onu da qeyd edib ki, müasir texnologiyalara əsasən dəniz suyunun təmizlənməsi hökumətin gündəliyində çoxdan var idi:
“Bu mənada Sumqayıt Kimya Sənaye Parkında günlük istehsal gücü 300 min m³ su olan zavodun tikintisi gözlənilən idi. Hesab edirəm ki, bu zavod Abşeron yarımadasının şirin suya olan ehtiyacının ödənilməsində öz sözünü deyəcək. Yəqin ki, bu maraqlı təcrübə yaxın gələcəkdə həm Bakıda, həm də digər sahilyanı şəhərlərdə tətbiq olunacaq”.
