Sumqayıt şəhərinin Corat bağlarında evə silahlı basqın edərək 3 nəfəri öldürüb, 3 nəfəri yaralamaqda şübhəli bilinən Müşfiq Tağıyevin barəsindəki qərardan verilən kassasiya şikayətə baxılıb.
Pravda.az-ın məlumatına görə, Ali Məhkəmənin hakimi Nazim Mövsümovun sədrliyi ilə keçirilən prosesdəki qərara əsasən, kassasiya şikayətləri təmin edilməyib.
Xatırladaq ki, hadisə 28 oktyabr 2023-cü ildə səhər saatlarında baş verib. Müşfiq Tağıyev qonşusu Anar Fərəcovdan qisas almaq məqsədilə onun ailəsinin yaşadığı evə hücum edib. O, əvvəlcə evin divarlarına benzin tökərək yandırıb, daha sonra özünün hazırladığı partlayıcı qurğunu işə salıb və sonda odlu silahla atəş açıb. Odlu silahdan açılan atəş nəticəsində iki nəfər - Susana Karakaş və Dağbəyi Fərəcov ölüb.
Sonradan yaralılardan biri - Türkiyə xəstəxanasına köçürülən Serkan Karakaş da orada vəfat edib.
Hadisə zamanı evdə olan azyaşlı uşaqlar, Tərlan Fərəcova və köməyə gələn qonşular Etibar və Mehman Sarıyev də yaralanıblar. İstintaqla müəyyən edilib ki, təqsirləndirilən şəxs bu şəxsləri də qəsdən öldürməyə cəhd edib.
Sumqayıt Ağır Cinayətlər Məhkəməsinin hökmü ilə təqsirləndirilən şəxs ömürlük azadlıqdan məhrumetmə cəzasına məhkum edilib.
Sumqayıt Apellyasiya Məhkəməsinin qərarına əsasən, apellyasiya şikayəti təmin edilməyib.
