Sumqayıt Ağır Cinayətlər Məhkəməsində quldurluqda təqsirləndirilən Amil Babayevin (adı, soyadı şərtidir) cinayət işi üzrə araşdırmanın detalları məlum olub.
Pravda.az-ın məlumata görə, məhkəmə istintaqı zamanı ittiham aktı elan olunub.
İstintaq materiallarına görə, o, 21 avqust 2025-ci il saat 22 radələrində Sumqayıtın 76-cı məhəlləsində yerləşən mağazaya daxil olaraq satıcıları hədələyib. O, sağ əlini cibində saxlayaraq guya silahlı olduğunu göstərib. Təqsirləndirilən şəxs kassadakı pulların, həmçinin müxtəlif elektron platformalar vasitəsilə hesablarına vəsait köçürülməsini tələb edib.
Zərərçəkmiş şəxslər kassadan ümumilikdə 627 manatı müxtəlif onlayn hesablara köçürüblər, əlavə olaraq 100 manat nağd pul veriblər. Beləliklə, ümumilikdə 727 manat ələ keçirilib.
Əməl Cinayət Məcəlləsinin 181.1-ci (quldurluq) maddəsi ilə tövsif olunub.
Məhkəmədə Amil Babayev özünü qismən təqsirli bilib. O bildirib ki, ailəsinin maddi sıxıntıları, azyaşlı övladının ehtiyacları və borclar səbəbindən çıxılmaz vəziyyətdə qalıb. Yaxınlarından borc ala bilmədiyini, spirtli içki qəbul etdikdən sonra emosional vəziyyətdə bu addımı atdığını deyib.
Təqsirləndirilən şəxs mağaza işçilərinə xəsarət yetirmək niyyətinin olmadığını, həyat yoldaşının adına götürülmüş kreditləri qismən ödəyib və uşağının ehtiyaclarına pul göndərdiyini bildirib. O, hadisədən sonra peşman olduğunu qeyd edib.
İş materiallarına əsasən, Amil Babayev əvvəllər məhkum olunmayıb, ailəlidir, azyaşlı övladı var və dönərçi kimi çalışıb.
