Bu gün tanınmış teatr və kino xadimi, Xalq artisti Hacı İsmayılovun doğum günüdür. Görkəmli aktyor 82 yaşını qeyd edir.
Hacı Məcid oğlu İsmayılov 1944-cü il yanvarın 22-də Bakı şəhərində anadan olub. O, 190 nömrəli orta məktəbdə təhsil alıb. 1963-cü ildə Mirzağa Əliyev adına Azərbaycan Dövlət Teatr İnstitutunun Dram və kino aktyorluğu fakültəsinə qəbul olunub. Daha sonra Sumqayıt Dövlət Dram Teatrına dəvət alaraq 1968-ci il sentyabrın 2-dən etibarən teatrın gənc truppasında fəaliyyətə başlayıb.
Sumqayıt teatrında ilk rollarından biri M.F.Axundovun "Müsyö Jordan və dərviş Məstəlişah" əsərində dərviş Məstəlişah obrazı olub. Ardınca C.Patrikin "Qəribə missis Səvic" tamaşasında Ceffi, A.Papayanın "Bəli, dünya dəyişib" komediyasında Səməndər, C.Cabbarlının "Sevil" əsərində isə Məmmədəli bəy rolunu canlandırıb. 1970-ci il fevralın 16-dan etibarən Akademik Milli Dram Teatrında çalışmağa başlayıb və ilk olaraq H.Cavidin "Xəyyam" faciəsində İkinci Qulam rolunda səhnəyə çıxıb.
Aktyorun kinoda ilk işi "Azərbaycanfilm" kinostudiyasında çəkilmiş "Ad günü" filmində Mustafa rolu olub. Bu obraz onu geniş tanıdıb və 22 aprel 1980-ci ildə o, Respublikanın Dövlət mükafatı laureatı adına layiq görülüb.
Hacı İsmayılov prezident təqaüdçüsüdür. O, Azərbaycan Teatr Xadimləri İttifaqının "Sənətkar" medalı ilə təltif edilib, 21 yanvar 2019-cu ildə isə "Şöhrət" ordeninə layiq görülüb.
Yaradıcılığında realist aktyor məktəbinin xüsusiyyətləri üstünlük təşkil edir. Akademik Milli Dram Teatrında ifa etdiyi əllidən artıq rolun böyük hissəsi bu üslubun estetik prinsiplərinə uyğun qurulub.
Aktyorun filmoqrafiyasına "Atayevlər ailəsi", "Babamızın babasının babası", "Bəyin oğurlanması", "Fəryad", "Güzgü", "Həm ziyarət, həm ticarət…", "Qonşu qonşu olsa…", "Məşədi İbad-94", "Ölsəm… bağışla", "Ulduz", "Təxribat" və digər filmlər daxildir.
Hacı İsmayılov 2000-ci ildə Azərbaycanın "Xalq artisti" fəxri adına layiq görülüb. O, ailəlidir, iki övladı və üç nəvəsi var.
