Sumqayıtda 2000-ci il təvəllüdlü Məhərrəm anası Mayaya (adlar şərtidir - red.) xəsarət yetirib.
Demokrat.az-ın məlumatına görə, hadisəni törədən şəxs Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham edilib.
Cinayət işi üzrə təqsirləndirilən şəxs qismində ifadə verən Məhərrəm ona elan olunan ittiham üzrə özünü təqsirli bilib. O, ifadəsində narkotik istifadəçisi olduğunu, evdəkiləri incitdiyini, bəzən pəncərənin şüşələrini sındırdığını bildirib:
""Hadisə günü evdə narkotik vasitə qəbul etdiyim üçün anam söyüş söydü. Mən də əsəbiləşib söyüş söydüm və şüşəni vuraraq sındırdım. Lakin anamı vurmamışam. Əvvəllər anamı döymüşəm. Bunu etiraf etmişəm".
Təqsirləndirilən şəxs ibtidai istintaq zamanı verdiyi ifadəsində göstərib ki, zərərçəkən Maya doğma anasıdır. O, heç yerdə işləmədiyi və mütəmadi olaraq dostları ilə olduğu üçün evə gec saatlarda gəldiyinə görə anası onu danlayır. Bu səbəbdən də aralarında mübahisə yaranır:
"Hadisə günü saat 13 radələrində yaşadığımız evdə atam ilə söhbət edən zaman aramızda söz mübahisəsi yarandı. Anam Maya mübahisəyə müdaxilə edərək ünvanıma nalayiq ifadələr işlətdi. Mən də ona sakitləşməyi və öz işi ilə məşğul olmağı tövsiyə etdim. Anam isə sakitləşmədi, məni kobud şəkildə danladı. Ünvanıma nalayiq ifadə işlətdikdə anama yaxınlaşdım, əl zərbəsi ilə başının sağ yan nahiyəsindən vurdum. Həmin vaxt atam mübahisəyə müdaxilə edərək bizi ayırdı. Bundan sonra anam qaçaraq evdən çıxdı".
Bu cinayət işinə Sumqayıt Şəhər Məhkəməsində baxılıb. Məhkəmənin hökmü ilə Məhərrəm 5 ay müddətinə azadlıqdan məhrum edilib.
