Sumqayıtda 76-cı məhəllədə yol infrastrukturunun bərbad vəziyyətdə olması sakinlərin ciddi narazılığına səbəb olub.
Xeberle.com-un məlumatına görə, vətəndaşlar dəfələrlə Sumqayıt şəhər İcra Hakimiyyətinə və bələdiyyəyə müraciət etsə də, problemin həlli ilə bağlı hər hansı tədbir görülməyib.
Yolun asfaltlanmaması, xüsusilə payız-qış aylarında vəziyyəti daha da çətinləşdirir. Məhəllədə yaşayan məktəblilər yağış yağanda palçıq içində məktəbə getmək məcburiyyətində qalırlar. Valideynlərin sözlərinə görə, uşaqlar dərsə çatmaq üçün yolda ayaqqabı dəyişmək məcburiyyətində qalır və bəzən bir gün ərzində iki cüt ayaqqabı geyinməyə məcbur olurlar.
Sakinlər problemin həlli üçün öz imkanları hesabına yolun bir hissəsini düzəltsələr də, maddi imkanların məhdudluğu səbəbindən bütün yolu təmir edə bilməyiblər.
Şikayətçilər bildirirlər ki, sözügedən yol şəhərin əsas prospektlərindən biri olan Sülh küçəsinə çıxır. Bu səbəbdən sakinlər, yolun görünən hissəsində ayaqqabı dəyişmək məcburiyyətində qalırlar ki, bu da həm xoşagəlməz görüntü yaradır, həm də vətəndaşlar üçün ciddi narahatlıq doğurur.
Məhəllə sakinləri məsələ ilə bağlı aidiyyəti qurumlardan təcili tədbir görülməsini və yolun asfaltlanmasını xahiş edirlər.
Məsələ ilə bağlı Sumqayıt şəhər Bələdiyyəsi ilə əlaqə saxlanılıb. Qurumdan bildirilib ki, şəhərin 76-cı məhəlləsindəki yolsuzluq problemi ilə bağlı məlumatları var:
"Bələdiyyə də məhz məsuliyyət dairəsinə daxil olan ərazilərdəki yol problemini mərhələli şəkildə həll edir. Son aylar Sumqayıt şəhərinin bir sıra küçələrində təmir bərpa, eləcə də asfaltlanma işləri həyata keçirilir. Sakinlərimizin narahatlığını nəzərə alıb demək istəyirik ki, asfaltlama ilə bağlı məsələlər də mərhələli və növbəlilik prinsipinə əsasən həll olunur. Həmin ərazi də məhz Bələdiyyənin tədbirlər planına əlavə edilib və asfaltlanması gözlənilir".
