Sumqayıt şəhərində ekoloji vəziyyətlə bağlı narahatlıqlar getdikcə artır. Şəhər sakinlərinin Xeberle.com-a bildirdiyinə görə, bir sıra restoranlar və sənaye obyektləri tüstü bacalarında filtr sistemlərindən istifadə etmədən fəaliyyət göstərir ki, bu da havanın çirklənməsinə ciddi təsir edir.
Xüsusilə bəzi tanınmış restoranların, o cümlədən "Delux" kimi obyektlərin tüstü bacalarının standartlara cavab vermədiyi bildirilir. Filtrsiz işləyən bu məkanlardan çıxan tüstü və qoxu ətraf mühitə yayılaraq həm ekosistemə, həm də əhalinin sağlamlığına mənfi təsir göstərir.
Problemin daha ciddi tərəfi isə Şəfəq yaşayış massivinə (Stansiya Sumqayıt) gedən yol üzərində yerləşən armatur sexi ilə bağlıdır. Yerli sakinlərin sözlərinə görə, bu sex də heç bir filtr sistemi olmadan fəaliyyət göstərir. Nəticədə dəmir tullantılarının emalı zamanı yaranan zəhərli qazlar və kömür tüstüsü birbaşa atmosferə buraxılır.
Mütəxəssislər bildirirlər ki, bu cür halların qarşısı alınmasa, uzunmüddətli perspektivdə bölgədə hava keyfiyyətinin kəskin pisləşməsi, tənəffüs yolu xəstəliklərinin artması və ekosistemin zədələnməsi qaçılmaz olacaq.
Sakinlər aidiyyəti qurumları məsələ ilə bağlı ciddi tədbirlər görməyə çağırır. Ekoloji nəzarətin gücləndirilməsi, filtr sistemlərinin quraşdırılmasının məcburi edilməsi və qaydalara əməl etməyən obyektlərə qarşı sanksiyaların tətbiqi əsas tələb kimi irəli sürülür.
Mövzu ilə bağlı rəsmi qurumların mövqeyini də işıqlandırmağa hazırıq.
