Sumqayıtın əksər kafe və restoranları gizli də olsa, hələ də müxtəlif bəhanələrlə hesabı müştərilərə "kartdan karta” üsulu ilə ödətdirirlər.
Xeberle.com-un məlumatına görə, bu üsuldan "Gənclik City", "Newport Novxanı", "Müsafir" kimi restoranlarda istifadə olunur. İstehlakçılar müştərilərə guya POS-terminalların işləməməsi və ya enerjisinin olmaması barədə müxtəlif bəhanələr gətirirlər.
Lakin vətəndaşlar kassa çekini götürmədikdə, aldıqları mallarda yaranmış mümkün defekti və çatışmazlığı mağazaya sübut edə bilməyəcəklər.
Azad İstehlakçılar Birliyinin sədri Eyyub Hüseynov açıqlamasında bildirib ki, bu hallarda qəbzlər verilmədiyinə görə, vətəndaşın şikayəti olsa belə onun hüquqlarını müdafiə etmək olmur:
"Bir sıra marketlərdə, xəstəxanalarda verilən qəbzlərin keyfiyyətsiz olması, bu səbəbdən vətəndaşların ƏDV yükləyə bilməmələri barədə mənə daim telefon zəngləri gəlir. Vətəndaş deyəndə ki, kartla ödəniş etmək istəyirəm, deyirlər "onda pulu VÖEN-ə bağlı olmayan şəxsi bir karta köçür”. Belə yerlərin əksəriyyətində guya POS-terminal işləmirmiş kimi çoxlu bəhanələr gətirirlər. Bu cür ticarət yerləri vətəndaşların hüquqlarını pozmaqla dövlətin sosial siyasətinə də zərbə endirir. Belə hallarla qarşılaşan istehlakçılara "195” qaynar xəttinə zəng edərək İqtisadiyyat Nazirliyinə məlumat vermələrini tövsiyə edirəm”.
Qeyd edək ki, POS-terminalların quraşdırılmaması, quraşdırılmış obyektlərdə isə nağdsız ödənişlərin imtinasına görə 6 min manatadək cərimə nəzərdə tutulub.
