Qida Təhlükəsizliyi Agentliyi (AQTA) Sumqayıtda reydlər keçirib.
Sumqayit24.az xəbər verir ki, reydlər Heydər Əliyev prospektində yerləşən "Ordubad" market, Sülh küçəsində yerləşən "Əli-94" market, 20 Yanvar və N.Nərimanov küçələrinin kəsişməsində yerləşən "Karvan" ticarət mərkəzində, həmçinin qeyd olunan ərazilərin yol kənarı və səkilərində təşkil olunub.
Reyd zamanı küçələrdə antisanitar vəziyyətdə, heç bir norma və tələblərə cavab verməyən şəkildə qida məhsullarının satıldığı məlum olub. Həmin şəxslərə qanunun tələbləri izah olunub və qanunvericiliyə uyğun tədbirlər görülüb. Qida məhsullarının küçə və yol kənarlarında qanunsuz satışı hallarının təkrarlanmaması üçün aidiyyəti icra orqanlarına müvafiq məlumatlar verilib.
AQTA bildirir ki, sanitar-gigiyenik tələblərə cavab verməyən şəraitdə qida məhsullarının satışı insanların həyat və sağlamlığı üçün birbaşa təhlükə yaradır:
“Qida təhlükəsizliyi tələblərinə cavab verməyən yerlərdən qida məhsullarının alınaraq istehlak edilməsi isə tövsiyə olunmur. Qanunsuz olaraq qida məhsullarının açıq havada, antisanitar şəraitdə, heç bir mənşə sənədi və markalanması olmadan, saxlama şəraitinə riayət edilmədən satışa çıxarılması hallarına qarşı nəzarət tədbirləri agentlik tərəfindən davam etdiriləcək və müvafiq tədbirlərin görülməsi üçün aidiyyəti qurumlara müraciət olunacaq.
Vətəndaşlardan qarşılaşdıqları bu kimi xoşagəlməz hallarla bağlı aidiyyəti qurumlara və AQTA-nın “1003 - Çağrı Mərkəzi”nə məlumat vermələri xahiş edilir”.
