Sumqayıtda “Mediasiya - yeni trendlər və gözləntilər” mövzusunda konfrans təşkil olunub.
Report.az-ın məlumatına görə, ictimai müzakirə formatında baş tutan konfransda deputat Səbinə Salmanova, Mediasiya Şurası İdarə heyətinin sədri Nadir Adilov, rəsmi şəxslər, müxtəlif qurumların nümayəndələri və 20 mediator iştirak edib.
Tədbirdə çıxış edən deputat Səbinə Salmanova tədbirin aktual məsələlərə həsr olunduğunu vurğulayıb.
Qeyd olunub ki, mediasiya sahəsində atılan ən mühüm addımlardan biri Mediasiya Şurasının 2020-ci il fevralın 16-da Ədliyyə Nazirliyi tərəfindən dövlət qeydiyyatına alınmasıdır. Mediasiya Şurası fəaliyyətə başlayandan sonra birbaşa məhkəmələrdə baxılmalı olan müəyyən kateqoriya üzrə işlərə mediasiya prosesi çərçivəsində baxılır və həmin prosesi keçmədən qeyd olunan ərizələrə məhkəmələrdə baxılmasına yol verilmir.
S.Salmanova Mediasiya Şurasında çox mühüm dəyişikliklərə və yeniliklərə imza atıldığını bildirib.
Konfransda çıxış edən digər natiqlər qısa müddət ərzində Mediasiya Şurasının fəaliyyətində mühüm nailiyyətlərin əldə olunmasını Azərbaycanda mediasiya institutunun sürətli inkişafının göstəricisi kimi qiymətləndiriblər.
Daha sonra konfrans iştirakçıları Sumqayıt şəhər 1 saylı mediasiya təşkilatının inzibati binasına baxış keçiriblər.
